Elon Musk: Soros do të shkatërrojë strukturën e qytetërimit

Miliarderi Elon Musk mbrojti komentet që kishte bërë ndaj George Soros në Twitter, duke u thënë kritikëve të tij se kanë nevojë që të qetësohen.

Pasi Soros shiti aksionet e tij në kompaninë Tesla, Musk tha se megadonatori i të majtës i kujton personazhin ‘Magneto’. Ky i fundit është një personazh i Marvel, që urren njerëzimin dhe kërkon zhdukjen e tij.

“Ata supozojnë se kanë qëllime të mira. Por nuk është kështu,” tha Musk për Soros. “Ai kërkon që të shkatërrojë vetë strukturën e qytetërimit. Soros e urren njerëzimin”.

Musk tha më vonë në një intervistë për CNBC se njerëzit duhet të qetësohen lidhur me komentet e tij.

“Unë thashë se ai më kujton Magneto-n. Qetësohuni njerëz. Ishte një metaforë”.

Kur u pyet mbi deklaratën e tij se Soros e urren njerëzimin, Musk tha: “Po, mendoj se është e vërtetë. Ky është mendimi im”.

Madje ai tha se nuk shqetësohet për faktin se qëndrimet e tij mund të ndikojnë bizneset e tij, përfshi kompaninë Twitter dhe Tesla.

“Do të them atë që dua të them, dhe nëse pasojat janë humbja e parave, le të ndodhë kështu”, tha Musk.