Gazeta RD
Policia e Tiranës ka arrestuar të dashurin e polices 21-vjeçare Aldorjana Loshi, e cila vrau veten dje në banesën ku jetonte me armën e shërbimit. I dashuri i saj, Endri Nika, 28 vjeç me banim në Kamzë ishte i pari që u shoqërua në Polici me nisjen e hetimit dhe dyshohet se ai, pasi ka konstatuar vetëvrasjen, ka njoftuar Policinë por duke fshirë më pas nga celulari i saj, komunikimin që ka pasur me të ndjerën në orët e fundit.
Autoritetet policore raportojnë se ditën e djeshme, 28-vjeçari ka shkuar në banesën e efektives, të cilën e ka gjetur të vrarë dhe ka fshirë komunikimet që ka patur me të në telefonin e saj dhe më pas ka njoftuar Policinë.
Viktima mësohet se kishte rreth një vit e gjysmë që punonte si efektive e patrullës në Kamëz. Motivet që e kanë shtyrë drejt aktit ekstrem janë ende të paqarta, por dyshohet se kanë qenë debatet me të dashurin e saj.
Njoftimi i Policisë së Tiranës
Në vijim të informacionit paraprak të dhënë ditën e djeshme, ku në rrugën “Todi Shkurti”, është vetëvrarë me armën e shërbimit shtetasja A. L., 21 vjeçe, punonjëse policie pranë Komisariatit të Policisë Nr. 5, specialistët për Hetimin e Krimeve të Komisariatit të Policisë Nr. 1, arrestuan shtetasin E. N., 28 vjeç, banues në Kamëz, për veprën penale “Veprime që pengojnë zbulimin e së vërtetës”.
Ky shtetas dyshohet se ditën e djeshme ka shkuar në banesën e shtetases A. L., dhe pasi ka njoftuar Policinë për ngjarjen e ndodhur, ka fshirë mesazhet me shtetasen A. L., në telefonin e saj. Materialet i kaluan Prokurorisë.
